کیا خبر تھی عشق میں یہ بھی ستم ہو جائے گا

کیا خبر تھی عشق میں یہ بھی ستم ہو جائے گا

آنکھ میں آنسو نہ ہوں گے درد کم ہو جائے گا

اپنے عیبوں دوسروں کی خوبیوں پر رکھ نظر

تو بھی دنیا کی نظر میں محترم ہو جائے گا

میرے آنسو جیسے ان کی آنکھ سے بہنے لگے

کیا کبھی یہ معجزہ اے چشم نم ہو جائے گا

کس کو تھا معلوم ہنستا کھیلتا بچپن مرا

مفلسی کی زد میں آ کے وقف غم ہو جائے گا

پستہ قد لوگوں میں فرحتؔ سر بلندی جرم ہے

دیکھنا تیرا بھی اک دن سر قلم ہو جائے گا