کیا خبر تھی یک بیک محشر بپا ہو جائے گا

کیا خبر تھی یک بیک محشر بپا ہو جائے گا

وہ ذرا سی بات پر اتنا خفا ہو جائے گا

دوست ہے ناراض ہے وہ کوئی دشمن تو نہیں

میں جو بولوں گا تو خود ہی بولنا ہو جائے گا

کیا ہوا گر اجنبی کی طرح پھرتا ہوں میں آج

کل مجھے یہ شہر خود پہچانتا ہو جائے گا

صبح تک اخبار کچھ بھوکے تو رہ سکتے نہیں

رات تو ہونے دو کوئی حادثہ ہو جائے گا

چھانٹ دے جلاد تو قطرے ہمارے خون کے

اور بھی کچھ رنگ مقتل خوش نما ہو جائے گا

فکر‌ مستقبل سے کیوں مر مر کے جیتا ہے عزیزؔ

ہونے والا ہے جو قسمت کا لکھا ہو جائے گا