کیا کیجیئے رقم سند‌ احتشام زلف

کیا کیجیئے رقم سند‌ احتشام زلف

ہے دفتر جمال پہ طغراے لام زلف

خدمت ہو غازۂ گل رخ کی نسیم کو

موج ہوا چمن میں کرے انتظام زلف

فصل بہار آئی جنوں خیز دیکھیے

سودائیوں کو آنے لگے پھر پیام زلف

موذی جو سر چڑھا تو بنا مار آستیں

سر پہ نہ چاہئے تھا بتوں کے مقام زلف

سودائے زلف چین جبیں نے مٹا دیا

تاراج چینیوں نے کیا آ کے شام زلف

کب حسن عارضی پہ لٹکتی ہے صبح و شام

اسلام پر ہے طعن سے ہر دم سلام زلف

چھٹ کے اٹھا رہے ہیں اسیران دام زلف

آرام اب کہاں دل وحشی ہے رام زلف

بالوں کو اپنے تم رخ روشن پہ چھوڑ دو

پھینکو میان چشمۂ خورشید دام زلف

تقریر کیوں نہ الجھی ہوئی بر زباں رہے

ہے درس میں رسالہ‌ٔ علم کلام زلف

دیوانے ہم ہیں گردش لیل و نہار کے

ہے صبح صبح روئے پری شام شام زلف

پایا سیاہ‌ بختی عشاق نے بھی اوج

فیروزۂ فلک پہ کیا کندہ نام زلف

زلفیں ہوا سے کب رخ عارض پہ آ گئیں

ہے سبزۂ بہار کے منہ میں لگام زلف

آئے سیاہ دل ہیں رقیبوں کے اس پہ مہرؔ

پوشش میں ہے عبث حرم احترام زلف