kya koi mere gham main raat bhar taDapta hai

kyā koī mire ġham maiñ raat bhar taḌaptā hai

kyoñ mirā dil-e-mahzūñ shaam se dhaḌaktā hai

āshiqī kī bastī meñ shā.irī kī duniyā meñ

dard jitnā baḌhtā hai aadmī nikhartā hai

chāñd so gayā shāyad raat Dhalne vaalī hai

kis umiid meñ ai dil phir bhī tū machaltā hai

kaj-kulāh mah-pāro merī bhī zarā sun lo

āftāb ko dekho ek vaqt Dhaltā hai

kab bujhā sakoge tum tīrgī ke matavālo

ik charāġh jo mere ḳhūn-e-dil se jaltā hai

aaj phir chalī shāyad shām-e-ġham kī purvā.ī

chāñdnī meñ kyoñ āḳhir zaḳhm-e-dil mahaktā hai

ibtidā-e-ulfat hai aur kisī kī furqat kī

dhīmī dhīmī āñchoñ par aaj kaun jaltā hai

vo jo ek pāgal hai kahte haiñ jise pāshā

gul-ruḳhoñ kī sohbat meñ aur bhī sanaktā hai

kya koi mere gham main raat bhar taDapta hai

kyon mera dil-e-mahzun sham se dhaDakta hai

aashiqi ki basti mein shairi ki duniya mein

dard jitna baDhta hai aadmi nikharta hai

chand so gaya shayad raat Dhalne wali hai

kis umid mein ai dil phir bhi tu machalta hai

kaj-kulah mah-paro meri bhi zara sun lo

aaftab ko dekho ek waqt Dhalta hai

kab bujha sakoge tum tirgi ke matawalo

ek charagh jo mere KHun-e-dil se jalta hai

aaj phir chali shayad sham-e-gham ki purwai

chandni mein kyon aaKHir zaKHm-e-dil mahakta hai

ibtida-e-ulfat hai aur kisi ki furqat ki

dhimi dhimi aanchon par aaj kaun jalta hai

wo jo ek pagal hai kahte hain jise pasha

gul-ruKHon ki sohbat mein aur bhi sanakta hai