kya koi samjhe mere haalat jab kahta hun main

kyā koī samjhe mire hālāt jab kahtā huuñ maiñ

ik musalsal raushnī ke saa.e meñ rahtā huuñ maiñ

jab havā chaltī hai uḌtā huuñ muḳhālif samt meñ

aur jab tham jaa.e tab apnī taraf bahtā huuñ maiñ

tere mere lahje kā ye farq kitnā saaf hai

tū mujhe kahtī hai tū aur maiñ tujhe kahtā huuñ maiñ

aap se maiñ ḳhush huuñ to ye aap par ehsān hai

ik aziyyat hai ḳhushī bhī hañs ke jo sahtā huuñ maiñ

shaam ke Dhalne se pahle maiñ kabhī piitā nahīñ

ye bhī sach hai dopahar se tishna-lab rahtā huuñ maiñ

kūza-gar ye sochtā hai ye usī kā kaam hai

is salīqe se kabhī bantā kabhī Dhahtā huuñ maiñ

kya koi samjhe mere haalat jab kahta hun main

ek musalsal raushni ke sae mein rahta hun main

jab hawa chalti hai uDta hun muKHalif samt mein

aur jab tham jae tab apni taraf bahta hun main

tere mere lahje ka ye farq kitna saf hai

tu mujhe kahti hai tu aur main tujhe kahta hun main

aap se main KHush hun to ye aap par ehsan hai

ek aziyyat hai KHushi bhi hans ke jo sahta hun main

sham ke Dhalne se pahle main kabhi pita nahin

ye bhi sach hai dopahar se tishna-lab rahta hun main

kuza-gar ye sochta hai ye usi ka kaam hai

is saliqe se kabhi banta kabhi Dhahta hun main