کیا کوئی زمانہ میں ستم گر نہیں ہوتا

کیا کوئی زمانہ میں ستم گر نہیں ہوتا

ہوتا ہے مگر آپ سے بڑھ کر نہیں ہوتا

سینے سے لگاتا ہے وہی اہل وفا کو

دل جس کا تمہاری طرح پتھر نہیں ہوتا

غم آپ کا ہے میرے لیے ایک خزانہ

ہر اک کو خزانہ یہ میسر نہیں ہوتا

جو سود و زیاں سوچ رہا ہو سر ساحل

وہ بحر محبت کا شناور نہیں ہوتا

ہم گردش دوراں کے ستائے ہوئے انساں

مر جاتے شوالوں کا جو وا در نہیں ہوتا

اس دور میں پروازؔ خدا تو ہے بڑی چیز

انساں کا بھی دیدار میسر نہیں ہوتا