kya koi zamane mein sitamgar nahin hota

kyā koī zamāne meñ sitamgar nahīñ hotā

hotā hai magar aap se baḌh kar nahīñ hotā

siine se lagātā hai vahī ahl-e-vafā ko

dil jis kā tumhārī tarah patthar nahīñ hotā

ġham aap kā hai mere liye ek ḳhazāna

har ik ko ḳhazāna ye mayassar nahīñ hotā

jo sūd-o-ziyāñ soch rahā ho sar-e-sāhil

vo bahr-e-mohabbat kā shanāvar nahīñ hotā

ham gardish-e-daurāñ ke satā.e hue insāñ

mar jaate shivāloñ kā jo vā dar nahīñ hotā

is daur meñ 'parvāz' ḳhudā to hai baḌī chiiz

insāñ kā bhī dīdār mayassar nahīñ hotā

kya koi zamane mein sitamgar nahin hota

hota hai magar aap se baDh kar nahin hota

sine se lagata hai wahi ahl-e-wafa ko

dil jis ka tumhaari tarah patthar nahin hota

gham aap ka hai mere liye ek KHazana

har ek ko KHazana ye mayassar nahin hota

jo sud-o-ziyan soch raha ho sar-e-sahil

wo bahr-e-mohabbat ka shanawar nahin hota

hum gardish-e-dauran ke satae hue insan

mar jate shiwalon ka jo wa dar nahin hota

is daur mein 'parwaz' KHuda to hai baDi chiz

insan ka bhi didar mayassar nahin hota