kya kya ba-dast-e-ghaib sabhi ne liya na tha

kyā kyā ba-dast-e-ġhaib sabhī ne liyā na thā

lekin mirī vafā kā koī bhī sila na thā

āvāza-e-raqīb se uljhe haiñ baar baar

tujh se shikāyatoñ kā magar hausla na thā

us kī navāzishoñ pe na itrāo dosto

mujh par karam vo thā ki kisī par huā na thā

lete haiñ baar baar vo aise ḳhudā kā naam

duniyā meñ jaise aur kisī kā ḳhudā na thā

raste dayār-e-dil ke bhī kitne ajiib the

sab rāh-rau the koī yahāñ rahnumā na thā

dil ne to apnī baat kahī sab ke rū-ba-rū

dil thā munāfiqat se kabhī āshnā na thā

shīsha-garoñ ne us kī basīrat bhī chhīn lī

āñkheñ thiiñ us ke paas magar dekhtā na thā

nādīda manziloñ ke musāfir the kitne log

chalnā thā jin kā kaam magar aasrā na thā

kyā bujh ga.e the mere hī ghar ke sabhī charāġh

yā shahr bhar meñ koī diyā bhī jalā na thā

ham ne bhī ḳhūn-e-dil se jalā.ī haiñ mish.aleñ

har chand apne paas koī mo.ajiza na thā

taqsīm ho ga.ī thī nazar rang-rang meñ

dekhā jo ġhaur se koī kāñTā burā na thā

us gul kā āb-o-rang hī thā rū-kash-e-bahār

jo gul darūn-e-shāḳh thā lekin khilā na thā

qātil to aur bhī the bahut shahr-e-dard meñ

tujh sā magar 'jamīl' koī dūsrā na thā

kya kya ba-dast-e-ghaib sabhi ne liya na tha

lekin meri wafa ka koi bhi sila na tha

aawaza-e-raqib se uljhe hain bar bar

tujh se shikayaton ka magar hausla na tha

us ki nawazishon pe na itrao dosto

mujh par karam wo tha ki kisi par hua na tha

lete hain bar bar wo aise KHuda ka nam

duniya mein jaise aur kisi ka KHuda na tha

raste dayar-e-dil ke bhi kitne ajib the

sab rah-rau the koi yahan rahnuma na tha

dil ne to apni baat kahi sab ke ru-ba-ru

dil tha munafiqat se kabhi aashna na tha

shisha-garon ne us ki basirat bhi chhin li

aankhen thin us ke pas magar dekhta na tha

nadida manzilon ke musafir the kitne log

chalna tha jin ka kaam magar aasra na tha

kya bujh gae the mere hi ghar ke sabhi charagh

ya shahr bhar mein koi diya bhi jala na tha

hum ne bhi KHun-e-dil se jalai hain mishalen

har chand apne pas koi moajiza na tha

taqsim ho gai thi nazar rang-rang mein

dekha jo ghaur se koi kanTa bura na tha

us gul ka aab-o-rang hi tha ru-kash-e-bahaar

jo gul darun-e-shaKH tha lekin khila na tha

qatil to aur bhi the bahut shahr-e-dard mein

tujh sa magar 'jamil' koi dusra na tha