kya kya badal gae hain andaz aadmi ke

kyā kyā badal ga.e haiñ andāz aadmī ke

paisa hī ab ḳhudā hai parde meñ bandagī ke

office meñ laTe aanā pahchān afsaroñ kī

aur qisse chheḌte haiñ daftar meñ dil-lagī ke

rishvat ko haq samajh kar bharte haiñ jeb apnī

har tarah kar rahe haiñ sāmān behtarī ke

haiñ be-zamīr phir bhī da.avā hai leaderī kā

ab vote māñgte haiñ tālib haiñ membarī ke

bas naam rah gayā hai insāf ab kahāñ hai

haq apnā kis se māñgeñ mazlūm is sadī ke

afsāne nekiyoñ ke be-jān ho rahe haiñ

mansūbe ban rahe haiñ ab chaar sū badī ke

kyā inqalāb aayā badlī havā kuchh aisī

beTe bane minister imrān mistirī ke

vaa.iz bhī āj-kal ke mai-ḳhvār ho ga.e haiñ

dete haiñ va.az ham ko aksar sharāb pī ke

qismat se vo hamāre hukkām ban ga.e haiñ

hote the roz charche jin kī sitamgarī ke

bantī thī pahle sabzī ghī kā baghār de kar

sabzī se ban rahe haiñ ab Dabbe roz ghī ke

vo kaun hai jo baḌh kar āvāz-e-haq uThā.e

sab sūrmā bane haiñ unvān-e-buzdilī ke

kya kya badal gae hain andaz aadmi ke

paisa hi ab KHuda hai parde mein bandagi ke

office mein laTe aana pahchan afsaron ki

aur qisse chheDte hain daftar mein dil-lagi ke

rishwat ko haq samajh kar bharte hain jeb apni

har tarah kar rahe hain saman behtari ke

hain be-zamir phir bhi dawa hai leaderi ka

ab wote mangte hain talib hain membari ke

bas nam rah gaya hai insaf ab kahan hai

haq apna kis se mangen mazlum is sadi ke

afsane nekiyon ke be-jaan ho rahe hain

mansube ban rahe hain ab chaar su badi ke

kya inqalab aaya badli hawa kuchh aisi

beTe bane minister imran mistiri ke

waiz bhi aaj-kal ke mai-KHwar ho gae hain

dete hain waz hum ko aksar sharab pi ke

qismat se wo hamare hukkaam ban gae hain

hote the roz charche jin ki sitamgari ke

banti thi pahle sabzi ghi ka baghaar de kar

sabzi se ban rahe hain ab Dabbe roz ghi ke

wo kaun hai jo baDh kar aawaz-e-haq uThae

sab surma bane hain unwan-e-buzdili ke