kya kya diye hain zist ne gham kuchh na puchhiye

kyā kyā diye haiñ ziist ne ġham kuchh na pūchhiye

kitne kiye ga.e haiñ karam kuchh na pūchhiye

āñkhoñ meñ ashk lab pe tabassum jigar meñ soz

kaise rakhā hai ġham kā bharam kuchh na pūchhiye

ik paikar-e-hasīñ kī parastish ke vāste

kyā kyā tarāshe ham ne sanam kuchh na pūchhiye

is daur-e-ibtilā meñ ba-īñ-aql-o-āgahī

bechārgī-e-ahl-e-qalam kuchh na pūchhiye

pahuñchā kahāñ kahāñ maiñ ḳhudā kī talāsh meñ

ai nāzirīn-e-dair-o-haram kuchh na pūchhiye

in donoñ manziloñ se zarā sochtā huuñ maiñ

mujh se mirā vajūd-o-adam kuchh na pūchhiye

is muḳhtasar sī ziist meñ 'bāsit-azīm' ne

kyā kyā uThā.e bār-e-alam kuchh na pūchhiye

kya kya diye hain zist ne gham kuchh na puchhiye

kitne kiye gae hain karam kuchh na puchhiye

aankhon mein ashk lab pe tabassum jigar mein soz

kaise rakha hai gham ka bharam kuchh na puchhiye

ek paikar-e-hasin ki parastish ke waste

kya kya tarashe hum ne sanam kuchh na puchhiye

is daur-e-ibtila mein ba-in-aql-o-agahi

bechaargi-e-ahl-e-qalam kuchh na puchhiye

pahuncha kahan kahan main KHuda ki talash mein

ai nazirin-e-dair-o-haram kuchh na puchhiye

in donon manzilon se zara sochta hun main

mujh se mera wajud-o-adam kuchh na puchhiye

is muKHtasar si zist mein 'basit-azim' ne

kya kya uThae bar-e-alam kuchh na puchhiye