kya kya na sahe humne sitam aap ki KHatir

kyā kyā na sahe ham ne sitam aap kī ḳhātir

ye jaan bhī jā.egī sanam aap kī ḳhātir

taḌpe haiñ sadā apnī qasam aap kī ḳhātir

niklegā kisī roz ye dam aap kī ḳhātir

ik aap jo mil jaa.eñ to mil jaa.e ḳhudā.ī

manzūr haiñ duniyāñ ke alam aap kī ḳhātir

ham aap kī tasvīr nigāhoñ meñ chhupā kar

jaagā kiye aksar shab-e-ġham aap kī ḳhātir

logoñ ne hameñ aap kā dīvāna batāyā

aise bhī hue ham pe karam aap kī ḳhātir

ham rāh-e-vafā se kabhī pīchhe na haTeñge

sun lījiye miT jā.eñge ham aap kī ḳhātir

kya kya na sahe hum ne sitam aap ki KHatir

ye jaan bhi jaegi sanam aap ki KHatir

taDpe hain sada apni qasam aap ki KHatir

niklega kisi roz ye dam aap ki KHatir

ek aap jo mil jaen to mil jae KHudai

manzur hain duniyan ke alam aap ki KHatir

hum aap ki taswir nigahon mein chhupa kar

jaga kiye aksar shab-e-gham aap ki KHatir

logon ne hamein aap ka diwana bataya

aise bhi hue hum pe karam aap ki KHatir

hum rah-e-wafa se kabhi pichhe na haTenge

sun lijiye miT jaenge hum aap ki KHatir