kya kya na tere sadme se baad-e-KHizan gira

kyā kyā na tere sadme se bād-e-ḳhizāñ girā

gul barg sarv fāḳhta kā āshiyāñ girā

likhne lagī qazā jo hamārī fatādgī

sau baar haath se qalam-e-do-zabāñ girā

jab pahuñche ham kināra-e-maqsūd ke qarīb

tab nāḳhudā jahāñ se uThā bādbāñ girā

mūbāf-e-surḳh choTī se kyā un kī khul paḌā

ek sā.iqa sā dil pe mire nā-gahāñ girā

tā āsmāñ pahuñch ke huī aah sar-nigūñ

yā rab ho ḳhair fauj-e-alam kā nishāñ girā

uTh kar chalā jo paas se un ke to ghar talak

har har qadam pe zof se maiñ nā-tavāñ girā

dekhā jo dasht-e-najd meñ hāl-e-tabāh-e-qais

mahmil se lailā kuud paḌī sār-bāñ girā

dozaḳh pe kyuuñ na ho dil-e-'bīmār' tāna-zan

ātish se ishq kī hai patiñgā yahāñ girā

kya kya na tere sadme se baad-e-KHizan gira

gul barg sarw faKHta ka aashiyan gira

likhne lagi qaza jo hamari fatadgi

sau bar hath se qalam-e-do-zaban gira

jab pahunche hum kinara-e-maqsud ke qarib

tab naKHuda jahan se uTha baadban gira

mubaf-e-surKH choTi se kya un ki khul paDa

ek saiqa sa dil pe mere na-gahan gira

ta aasman pahunch ke hui aah sar-nigun

ya rab ho KHair fauj-e-alam ka nishan gira

uTh kar chala jo pas se un ke to ghar talak

har har qadam pe zof se main na-tawan gira

dekha jo dasht-e-najd mein haal-e-tabah-e-qais

mahmil se laila kud paDi sar-ban gira

dozaKH pe kyun na ho dil-e-'bimar' tana-zan

aatish se ishq ki hai patinga yahan gira