kya lutf hawaon ke safar mein nahin rakkha

kyā lutf havāoñ ke safar meñ nahīñ rakkhā

yā jazba-e-parvāz hī par meñ nahīñ rakkhā

nanhā sā diyā bhī shab-e-tīra meñ bahut hai

saudā kisī ḳhurshīd kā sar meñ nahīñ rakkhā

bujh jā.eñge ḳhvāboñ ke charāġh āb-e-ravāñ se

is Dar se unheñ dīda-e-tar meñ nahīñ rakkhā

shāyad dar-o-dīvār bhī pahchān na paa.eñ

barsoñ se qadam apne hī ghar meñ nahīñ rakkhā

har roz koī taḳhta magar TuuT rahā hai

har-chand ki kashtī ko bhañvar meñ nahīñ rakkhā

sūraj to parāyā thā parāyā hī rahā vo

kyuuñ tum ne shajar rāh-e-guzar meñ nahīñ rakkhā

takmīl ke paikar meñ jise DhūñDh rahe haiñ

ḳhāka bhī 'salīm' is kā nazar meñ nahīñ rakkhā

kya lutf hawaon ke safar mein nahin rakkha

ya jazba-e-parwaz hi par mein nahin rakkha

nanha sa diya bhi shab-e-tira mein bahut hai

sauda kisi KHurshid ka sar mein nahin rakkha

bujh jaenge KHwabon ke charagh aab-e-rawan se

is Dar se unhen dida-e-tar mein nahin rakkha

shayad dar-o-diwar bhi pahchan na paen

barson se qadam apne hi ghar mein nahin rakkha

har roz koi taKHta magar TuT raha hai

har-chand ki kashti ko bhanwar mein nahin rakkha

suraj to paraya tha paraya hi raha wo

kyun tum ne shajar rah-e-guzar mein nahin rakkha

takmil ke paikar mein jise DhunDh rahe hain

KHaka bhi 'salim' is ka nazar mein nahin rakkha