kya lutf ki wo zulm bhi jari nahin rakhte

kyā lutf ki vo zulm bhī jaarī nahīñ rakhte

kyā dost haiñ kuchh laaj hamārī nahīñ rakhte

ham lipTe hue ghar se bhī rahte nahīñ lekin

hijrat kā koī ḳhauf bhī taarī nahīñ rakhte

e.ajāz-e-taḳhayyul se pahuñchte haiñ sar-e-arsh

ham ahl-e-hunar koī savārī nahīñ rakhte

rahne pe nahīñ tum hī jo tayyār to jaao

ham koī nishānī bhī tumhārī nahīñ rakhte

ye yaad rahe aan pe mar miTte haiñ ham log

mat bhūlnā ham jaan bhī pyārī nahīñ rakhte

kyuuñ bojh paroñ kā liye phirte haiñ na jaane

'ayyāz' parinde jo aTārī nahīñ rakhte

kya lutf ki wo zulm bhi jari nahin rakhte

kya dost hain kuchh laj hamari nahin rakhte

hum lipTe hue ghar se bhi rahte nahin lekin

hijrat ka koi KHauf bhi tari nahin rakhte

eajaz-e-taKHayyul se pahunchte hain sar-e-arsh

hum ahl-e-hunar koi sawari nahin rakhte

rahne pe nahin tum hi jo tayyar to jao

hum koi nishani bhi tumhaari nahin rakhte

ye yaad rahe aan pe mar miTte hain hum log

mat bhulna hum jaan bhi pyari nahin rakhte

kyun bojh paron ka liye phirte hain na jaane

'ayyaz' parinde jo aTari nahin rakhte