kya mila hum ko teri yari mein

kyā milā ham ko terī yaarī meñ

rahe ab tak umīd-vārī meñ

haath gahrā lagā kū-e-qātil

zor-e-lazzat hai zaḳhm-e-kārī meñ

dil jo be-ḳhud huā sabā laa.ī

kis kī bū nighat-e-bahārī meñ

Tuk udhar dekh tū bhalā ai chashm

fā.eda aisī ashk-bārī meñ

chaT lagā dete haiñ mire aañsū

silk-e-gauhar ke āb-dārī meñ

ruuTh kar us se maiñ jo kal bhāgā

nā-gahāñ dil kī be-qarārī meñ

aa liyā us ne dauḌ kar mujh ko

taak ke ochhal ek kyārī meñ

yuuñ lagā kahne bas divāna na ban

paaoñ rakh apnā hoshiyārī meñ

kab talak maiñ bhalā rahūñ shab-o-roz

terī aisī mazāj-dārī meñ

hai samāyā huā jo laḌkā-pan

aap kī vaz.a pyārī pyārī meñ

apnī bakrī kā muñh chiḌāte vaqt

kyā ḳhush aatī hai ye tumhārī ''meñ''

banda-e-bū-turāb hai 'inshā'

shak nahīñ us kī ḳhāksārī meñ

kya mila hum ko teri yari mein

rahe ab tak umid-wari mein

hath gahra laga ku-e-qatil

zor-e-lazzat hai zaKHm-e-kari mein

dil jo be-KHud hua saba lai

kis ki bu nighat-e-bahaari mein

Tuk udhar dekh tu bhala ai chashm

faeda aisi ashk-bari mein

chaT laga dete hain mere aansu

silk-e-gauhar ke aab-dari mein

ruTh kar us se main jo kal bhaga

na-gahan dil ki be-qarari mein

aa liya us ne dauD kar mujh ko

tak ke ochhal ek kyari mein

yun laga kahne bas diwana na ban

paon rakh apna hoshiyari mein

kab talak main bhala rahun shab-o-roz

teri aisi mazaj-dari mein

hai samaya hua jo laDka-pan

aap ki waza pyari pyari mein

apni bakri ka munh chiDate waqt

kya KHush aati hai ye tumhaari men

banda-e-bu-turab hai 'insha'

shak nahin us ki KHaksari mein