کیا موڑ عجب آیا یہ رشتوں کے سفر میں

کیا موڑ عجب آیا یہ رشتوں کے سفر میں

میں خود سے جدا ہو گیا اس راہ گزر میں

میں نے ہی ابھارے ہیں خطوط اس کے بدن کے

اک نقطۂ موہوم ہوں میں جس کی نظر میں

بیٹھا پس دیوار میں یہ سوچ رہا ہوں

کب روزن دیوار بدل جاتا ہے در میں

گم کثرت افراد میں ہو جاتے ہیں چہرے

انسان کی پہچان ہو کس طرح نگر میں

آئی نہ سہارے کو اک آواز شناسا

میں ڈوب گیا اپنی صداؤں کے بھنور میں

مسرور ہوں یوں ترک جہاں کر کے میں کیفیؔ

دنیا ہی سمٹ آئی ہے گویا مرے گھر میں