kya muafiq ho dawa ishq ke bimar ke sath

kyā muāfiq ho davā ishq ke bīmār ke saath

jī hī jaate nazar aa.e haiñ is āzār ke saath

raat majlis meñ tirī ham bhī khaḌe the chupke

jaise tasvīr lagā de koī dīvār ke saath

mar ga.e par bhī khulī rah ga.iiñ āñkheñ apnī

kaun is tarah muā hasrat-e-dīdār ke saath

shauq kā kaam khiñchā duur ki ab mehr misāl

chashm-e-mushtāq lagī jaa.e hai tūmār ke saath

raah us shoḳh kī āshiq se nahīñ ruk saktī

jaan jaatī hai chalī ḳhūbi-e-raftār ke saath

ve din ab sālte haiñ rātoñ ko barsoñ guzre

jin dinoñ der rahā karte the ham yaar ke saath

zikr-e-gul kyā hai sabā ab ki ḳhizāñ meñ ham ne

dil ko nā-chār lagāyā hai ḳhas o ḳhaar ke saath

kis ko har dam hai lahū rone kā hijrāñ meñ dimāġh

dil ko ik rabt sā hai dīda-e-ḳhūñ-bār ke saath

merī us shoḳh se sohbat hai be-ainihī vaisī

jaise ban jaa.e kisū saade ko ayyār ke saath

dekhiye kis ko shahādat se sar-afrāz kareñ

laag to sab ko hai us shoḳh kī talvār ke saath

bekalī us kī na zāhir thī jo tū ai bulbul

dam-kash-e-'mīr' huī us lab o guftār ke saath

kya muafiq ho dawa ishq ke bimar ke sath

ji hi jate nazar aae hain is aazar ke sath

raat majlis mein teri hum bhi khaDe the chupke

jaise taswir laga de koi diwar ke sath

mar gae par bhi khuli rah gain aankhen apni

kaun is tarah mua hasrat-e-didar ke sath

shauq ka kaam khincha dur ki ab mehr misal

chashm-e-mushtaq lagi jae hai tumar ke sath

rah us shoKH ki aashiq se nahin ruk sakti

jaan jati hai chali KHubi-e-raftar ke sath

we din ab salte hain raaton ko barson guzre

jin dinon der raha karte the hum yar ke sath

zikr-e-gul kya hai saba ab ki KHizan mein hum ne

dil ko na-chaar lagaya hai KHas o KHar ke sath

kis ko har dam hai lahu rone ka hijran mein dimagh

dil ko ek rabt sa hai dida-e-KHun-bar ke sath

meri us shoKH se sohbat hai be-ainihi waisi

jaise ban jae kisu sade ko ayyar ke sath

dekhiye kis ko shahadat se sar-afraaz karen

lag to sab ko hai us shoKH ki talwar ke sath

bekali us ki na zahir thi jo tu ai bulbul

dam-kash-e-'mir' hui us lab o guftar ke sath