کیا نوائے عبث اے غنچہ دہن کرتے ہیں

کیا نوائے عبث اے غنچہ دہن کرتے ہیں

باغ میں تیری صفت مرغ چمن کرتے ہیں

گفتگو بزم جہاں میں ہے تری باتوں کی

ذکر تیرا ہی تمام اہل سخن کرتے ہیں

تجھ کو لے جائیں چمن میں تو بگڑ جائے ہوا

ہم فقط خاطر مرغان چمن کرتے ہیں

جسم خاکی میں مری روح یہی کرتی ہے

قفس تنگ میں جو مرغ چمن کرتے ہیں

سرو قد غنچہ دہن سنبل و گل گیسو و رخ

تجھ کو کیا دیکھتے ہیں سیر چمن کرتے ہیں

دیکھنے آتے ہیں میرا تن پر داغ اے رشکؔ

لوگ جوہی میں تماشائے چمن کرتے ہیں