kya nazar ki hushyari KHud-asir-e-masti hai

kyā nazar kī hushyārī ḳhud-asīr-e-mastī hai

jo nigāh uThtī hai mahv-e-ḳhud-parastī hai

bādaloñ ko taktā huuñ jaane kitnī muddat se

ek buuñd paanī ko ye zabāñ tarastī hai

ik janam ke pyāse bhī sair hoñ to ham jāneñ

yuuñ to rahmat-e-yazdāñ chār-sū barastī hai

raat ġham kī aa.ī hai hoshiyār dil vaalo

dekhnā hai ye nāgin aaj kis ko Dastī hai

shāyad aaj ā.īna dil kā TuuT hī jaa.e

phir nazar kī vīrānī zindagī pe hañstī hai

maiñ ne apnī palkoñ par ġham-kade sajā.e haiñ

aarzū ke mātam meñ sogvār hastī hai

ab ba-tābish-e-aḳhtar tīrgī hai afzūñ-tar

raushnī bhī bik jaa.e ye kamāl-e-pastī hai

kya nazar ki hushyari KHud-asir-e-masti hai

jo nigah uThti hai mahw-e-KHud-parasti hai

baadalon ko takta hun jaane kitni muddat se

ek bund pani ko ye zaban tarasti hai

ek janam ke pyase bhi sair hon to hum jaanen

yun to rahmat-e-yazdan chaar-su barasti hai

raat gham ki aai hai hoshiyar dil walo

dekhna hai ye nagin aaj kis ko Dasti hai

shayad aaj aaina dil ka TuT hi jae

phir nazar ki virani zindagi pe hansti hai

main ne apni palkon par gham-kade sajae hain

aarzu ke matam mein sogwar hasti hai

ab ba-tabish-e-aKHtar tirgi hai afzun-tar

raushni bhi bik jae ye kamal-e-pasti hai