kya past apne azm-e-safar ho ke rah gae

kyā past apne azm-e-safar ho ke rah ga.e

āñkhoñ meñ chuur ḳhvāb-e-sahar ho ke rah ga.e

vo sabza-e-sharār kā chashma ubal paḌā

bāġh-o-bahār zer-o-zabar ho ke rah ga.e

guzrā idhar se sho.ala-e-tūfān bhī nahīñ

lekin navāh-e-shahr khañDar ho ke rah ga.e

be-ḳhauf sang-reze chalāne lage haiñ log

ham kis makāñ ke shīsha-o-dar ho ke rah ga.e

mujh ko musavvirī kā bahut shauq thā magar

nākām mere dast-e-hunar ho ke rah ga.e

ham aa ga.e haiñ aise ujāloñ ke shahr meñ

zaa.e.a hamāre zauq-e-nazar ho ke rah ga.e

us aadmī ke haath meñ ā.īna thā ajab

chehre ke rang rang-e-digar ho ke rah ga.e

āñdhī uThī na barf kī bārish huī magar

qurbān be-libās shajar ho ke rah ga.e

kya past apne azm-e-safar ho ke rah gae

aankhon mein chur KHwab-e-sahar ho ke rah gae

wo sabza-e-sharar ka chashma ubal paDa

bagh-o-bahaar zer-o-zabar ho ke rah gae

guzra idhar se shoala-e-tufan bhi nahin

lekin nawah-e-shahr khanDar ho ke rah gae

be-KHauf sang-reze chalane lage hain log

hum kis makan ke shisha-o-dar ho ke rah gae

mujh ko musawwiri ka bahut shauq tha magar

nakaam mere dast-e-hunar ho ke rah gae

hum aa gae hain aise ujalon ke shahr mein

zaea hamare zauq-e-nazar ho ke rah gae

us aadmi ke hath mein aaina tha ajab

chehre ke rang rang-e-digar ho ke rah gae

aandhi uThi na barf ki barish hui magar

qurban be-libas shajar ho ke rah gae