کیا پھر کوئی تقریب ملاقات نہ ہوگی

کیا پھر کوئی تقریب ملاقات نہ ہوگی

کیا یوں ہی چلے جاؤ گے کچھ بات نہ ہوگی

کیا تا بہ قیامت یوں سلگتے ہی رہیں گے

اس ظلم مسلسل کی مکافات نہ ہوگی

اب عالم حیرت میں گزر جائیں گی عمریں

اب دن کا تو کیا ذکر کبھی رات نہ ہوگی

لے جاؤ یہ دل بھی کہ امانت ہے تمہاری

دے جاؤ اگر داغ بڑی بات نہ ہوگی

یہ زیست ترے ہجر میں اے جان تمنا

کیا ہوگی اگر منزل آفات نہ ہوگی

اب دل پہ جو گزرے گی فقط دل میں رہے گی

اب رسم و رہ شکر و شکایات نہ ہوگی

احساس پہ اک غم کی گھٹا چھائی ہوئی ہے

اب کون سا موسم ہے کہ برسات نہ ہوگی