kya puchhte ho haal-e-dil-e-be-qarar aaj

kyā pūchhte ho hāl-e-dil-e-be-qarār aaj

jo kal thī hai vo gardish-e-lail-o-nahār aaj

us paikar-e-jafā ko na kos ai dil-e-hazīñ

terī tarah hai vo bhī bahut be-qarār aaj

mere hī dam se rah gayā mai-ḳhāne meñ bharam

varna janāb-e-shaiḳh ko miltā udhār aaj

us ne likhā hai bahr-ayādat kal ā.eñge

jiine bhī degā mujh ko dil-e-be-qarār aaj

kis mast kī duā huī maqbūl-e-bārgāh

aayā hai jhuum jhuum ke abr-e-bahār aaj

mere liye kahīñ bhī jahāñ meñ sukūñ nahīñ

le kar kahāñ chalā hai dil-e-be-qarār aaj

us gul ne jaane kyā mire baare meñ kah diyā

guzrī hai mujh se kaT ke nasīm-e-bahār aaj

ye faiz hai 'tabīb'-o-'qatīl' aur 'zār' kā

'āsī' jo shā.iroñ meñ hai terā shumār aaj

kya puchhte ho haal-e-dil-e-be-qarar aaj

jo kal thi hai wo gardish-e-lail-o-nahaar aaj

us paikar-e-jafa ko na kos ai dil-e-hazin

teri tarah hai wo bhi bahut be-qarar aaj

mere hi dam se rah gaya mai-KHane mein bharam

warna janab-e-shaiKH ko milta udhaar aaj

us ne likha hai bahr-ayaadat kal aaenge

jine bhi dega mujh ko dil-e-be-qarar aaj

kis mast ki dua hui maqbul-e-bargah

aaya hai jhum jhum ke abr-e-bahaar aaj

mere liye kahin bhi jahan mein sukun nahin

le kar kahan chala hai dil-e-be-qarar aaj

us gul ne jaane kya mere bare mein kah diya

guzri hai mujh se kaT ke nasim-e-bahaar aaj

ye faiz hai 'tabib'-o-'qatil' aur 'zar' ka

'asi' jo shairon mein hai tera shumar aaj