kya puchhte ho mujhko mohabbat mein kya mila

kyā pūchhte ho mujh ko mohabbat meñ kyā milā

donoñ-jahāñ kā dard ba-nām-e-ḳhudā milā

shāyad yahī hai hāsil-e-pāyān-e-ārzū

apnā pata nahīñ hai jo un kā patā milā

afsāna-e-hayāt kī takmīl ho ga.ī

jab un ke silsile se mirā silsila milā

jab se nahīñ vo naġhma-zan-e-sāz-e-zindagī

ik ek taar dil kā mujhe be-sadā milā

tum kyā mile mizha ke ziyā-bār kū-ba-kū

parde meñ shab ke sub.h kā rū-e-safā milā

har aarzū kī ek vahī jān-e-ārzū

har mudda.ā kā ek vahī mudda.ā milā

vaj.h-e-davām fitrat-e-ġham hī nahīñ faqat

dil bhī azal-tarāz abad-āshnā milā

kaisī bahār mauja-e-kaif-o-nishāt kyā

pahlu-e-gul na dāman-e-bād-e-sabā milā

jannat chamak chamak uThī rañg-o-jamāl kī

kis gul kī aarzū kā sharaf ai 'razā' milā

kya puchhte ho mujh ko mohabbat mein kya mila

donon-jahan ka dard ba-nam-e-KHuda mila

shayad yahi hai hasil-e-payan-e-arzu

apna pata nahin hai jo un ka pata mila

afsana-e-hayat ki takmil ho gai

jab un ke silsile se mera silsila mila

jab se nahin wo naghma-zan-e-saz-e-zindagi

ek ek tar dil ka mujhe be-sada mila

tum kya mile mizha ke ziya-bar ku-ba-ku

parde mein shab ke subh ka ru-e-safa mila

har aarzu ki ek wahi jaan-e-arzu

har muddaa ka ek wahi muddaa mila

wajh-e-dawam fitrat-e-gham hi nahin faqat

dil bhi azal-taraaz abad-ashna mila

kaisi bahaar mauja-e-kaif-o-nishat kya

pahlu-e-gul na daman-e-baad-e-saba mila

jannat chamak chamak uThi rang-o-jamal ki

kis gul ki aarzu ka sharaf ai 'raza' mila