kya qadr-e-ana hogi jabin jaan rahi hai

kyā qadr-e-anā hogī jabīñ jaan rahī hai

jis shahr meñ sajdoñ kī hī pahchān rahī hai

kuchh ham ne bhī duniyā ko satāyā hai bahr haal

kuchh apnī tabī.at se bhī halkān rahī hai

mazbūt rahā husn-e-nazar se mirā rishta

jab tak vo mire shahr meñ mehmān rahī hai

mai ne bhī diyā hai mirī vahshat ko baḌhāvā

do chaar dinoñ vo bhī nigahbān rahī hai

us ko to safar karte nahīñ dekhā kisī ne

rāhoñ kī magar dhuul use pahchān rahī hai

vo ho ki na ho farq nahīñ paḌtā hai kuchh bhī

ye raat ka.ī sadiyoñ se vīrān rahī hai

kyā jaane kahāñ ḳhatm ho 'ash.har' kī kahānī

ab tak to kisī dard kā unvān rahī hai

kya qadr-e-ana hogi jabin jaan rahi hai

jis shahr mein sajdon ki hi pahchan rahi hai

kuchh hum ne bhi duniya ko sataya hai bahr haal

kuchh apni tabiat se bhi halkan rahi hai

mazbut raha husn-e-nazar se mera rishta

jab tak wo mere shahr mein mehman rahi hai

mai ne bhi diya hai meri wahshat ko baDhawa

do chaar dinon wo bhi nigahban rahi hai

us ko to safar karte nahin dekha kisi ne

rahon ki magar dhul use pahchan rahi hai

wo ho ki na ho farq nahin paDta hai kuchh bhi

ye raat kai sadiyon se viran rahi hai

kya jaane kahan KHatm ho 'ashhar' ki kahani

ab tak to kisi dard ka unwan rahi hai