kya raushni-e-husn-e-sabih anjuman mein hai

kyā raushnī-e-husn-e-sabīh anjuman meñ hai

fānūs meñ hai sham.a ki tan pairahan meñ hai

bhaḌkātī hai junūñ ko gul-o-lāla kī bahār

ik aag sī lagī huī saare chaman meñ hai

purze samajh ke jāma-e-tan ke uḌā junūñ

vo jāma-zeb bhī to usī pairahan meñ hai

sūkhe shajar hare jo hue phir to kyā huā

nāsūr-e-nau hamāre bhī zaḳhm-e-kuhan meñ hai

bazm-e-ḳhayāl-e-yār meñ ġhairoñ kā kyā guzar

ḳhalvat jo chāhiye vo usī anjuman meñ hai

taqdīr-e-reg-e-shīsha-e-sā.at milī mujhe

kulfat safar kī raat din apne vatan meñ hai

bulbul kī ḳhush-navā.ī kā baa.is hai ishq-e-gul

dil meñ jo dard hai to maza bhī suḳhan meñ hai

rañg-e-ḳhizāñ bhī jis kā hai rashk-e-bahār-e-abr

vo kisht za.afarāñ kī hamāre vatan meñ hai

kya raushni-e-husn-e-sabih anjuman mein hai

fanus mein hai shama ki tan pairahan mein hai

bhaDkati hai junun ko gul-o-lala ki bahaar

ek aag si lagi hui sare chaman mein hai

purze samajh ke jama-e-tan ke uDa junun

wo jama-zeb bhi to usi pairahan mein hai

sukhe shajar hare jo hue phir to kya hua

nasur-e-nau hamare bhi zaKHm-e-kuhan mein hai

bazm-e-KHayal-e-yar mein ghairon ka kya guzar

KHalwat jo chahiye wo usi anjuman mein hai

taqdir-e-reg-e-shisha-e-saat mili mujhe

kulfat safar ki raat din apne watan mein hai

bulbul ki KHush-nawai ka bais hai ishq-e-gul

dil mein jo dard hai to maza bhi suKHan mein hai

rang-e-KHizan bhi jis ka hai rashk-e-bahaar-e-abr

wo kisht zafaran ki hamare watan mein hai