kya roz-e-hashr dun tujhe ai dad-gar jawab

kyā roz-e-hashr duuñ tujhe ai dād-gar javāb

a.amāl-nāme kā to hai peshānī par javāb

ruk ruk ke hañs ke yuuñ hī to de fitna-gar javāb

detā hai aur lutf mujhe terā har javāb

kis se misāl duuñ tirī zulf-e-darāz ko

umr-e-tavīl-e-ḳhizr hai ik muḳhtasar javāb

mushkil ke vaqt dil hī se kuchh mashvara kareñ

kyuuñ deñ kisī ko ġhair se ham pūchh kar javāb

karte haiñ sajda naqsh-e-qadam ko tamām log

hai ḳhāna-e-ḳhudā kā tirī rahguzar javāb

munkir-nakīr pūchhte haiñ DaañT DaañT kar

hoñ muntashir havās to kyā de bashar javāb

ḳhuld-o-saqar ke biich meñ hai koī ishq-e-yār

hai pul-sirāt kā ye mirī rahguzar javāb

kyuuñ sar jhukā rahā hai zarā aañkh to milā

degī mire savāl kā terī nazar javāb

ġhusse meñ yuuñ na aao ki ġhussa harām hai

tum baat hī se baat kā do soch kar javāb

zarroñ kī tarah ḳhaak meñ haiñ āshiqoñ ke dil

gar tū kare savāl to de rahguzar javāb

maiñ ne kiyā salām to chilman meñ chhup ga.e

dar-parda degī ab nigah-e-parda-dar javāb

hañgāma hashr kā sifat-e-gard rah gayā

tere ḳhirām kā na huā fitna-gar javāb

kyā apne bhole-pan se kaheñ dam meñ aa.e ho

har baat kā jo dete ho ab soch kar javāb

kyā hogā ḳhaak ho ke sar-e-charḳh jā.egā

ye zer-e-pā savāl vo bālā-e-sar javāb

likkhā hai mujh ko ho gayā terā lahū safed

maiñ bhī likhūñgā ḳhuun se sar phoḌ kar javāb

behosh kar ke pūchhte ho dil kā mudda.ā

detā bhī hai huzūr kahīñ be-ḳhabar javāb

ġhusse se kuchh kahūñ to vo kis tarah chup rahe

ik baat kā jo shaam se de tā-sahar javāb

chitvan se taaḌ jaate haiñ 'mā.il' kā mudda.ā

dil meñ idhar savāl hai lab par udhar javāb

kya roz-e-hashr dun tujhe ai dad-gar jawab

aamal-name ka to hai peshani par jawab

ruk ruk ke hans ke yun hi to de fitna-gar jawab

deta hai aur lutf mujhe tera har jawab

kis se misal dun teri zulf-e-daraaz ko

umr-e-tawil-e-KHizr hai ek muKHtasar jawab

mushkil ke waqt dil hi se kuchh mashwara karen

kyun den kisi ko ghair se hum puchh kar jawab

karte hain sajda naqsh-e-qadam ko tamam log

hai KHana-e-KHuda ka teri rahguzar jawab

munkir-nakir puchhte hain DanT DanT kar

hon muntashir hawas to kya de bashar jawab

KHuld-o-saqar ke bich mein hai koi ishq-e-yar

hai pul-siraat ka ye meri rahguzar jawab

kyun sar jhuka raha hai zara aankh to mila

degi mere sawal ka teri nazar jawab

ghusse mein yun na aao ki ghussa haram hai

tum baat hi se baat ka do soch kar jawab

zarron ki tarah KHak mein hain aashiqon ke dil

gar tu kare sawal to de rahguzar jawab

main ne kiya salam to chilman mein chhup gae

dar-parda degi ab nigah-e-parda-dar jawab

hangama hashr ka sifat-e-gard rah gaya

tere KHiram ka na hua fitna-gar jawab

kya apne bhole-pan se kahen dam mein aae ho

har baat ka jo dete ho ab soch kar jawab

kya hoga KHak ho ke sar-e-charKH jaega

ye zer-e-pa sawal wo baala-e-sar jawab

likkha hai mujh ko ho gaya tera lahu safed

main bhi likhunga KHun se sar phoD kar jawab

behosh kar ke puchhte ho dil ka muddaa

deta bhi hai huzur kahin be-KHabar jawab

ghusse se kuchh kahun to wo kis tarah chup rahe

ek baat ka jo sham se de ta-sahar jawab

chitwan se taD jate hain 'mail' ka muddaa

dil mein idhar sawal hai lab par udhar jawab