kya se kya aaKHir junun-e-fitna saman ban gaya

kyā se kyā āḳhir junūn-e-fitna sāmāñ ban gayā

barq-o-tūfāñ ban gayā bāġh-o-bahārāñ ban gayā

kal talak jis ḳhvāb kī ta.abīr raqs-o-rañg thī

ab vo ḳhvāb-e-zindagī ḳhvāb-e-pareshāñ ban gayā

chal rahī thī saañs jab tak raaz andar raaz thā

aur jab tār-e-nafas TuuTā to tūfāñ ban gayā

ḳhūn-e-dil kā ek qatra ek harf-e-nā-tamām

paḌhne vāloñ ke liye tārīḳh-e-daurāñ ban gayā

baḌh ga.ī jab apnī had se jur.at-e-āvārgī

ḳhud junūñ minnat-kash-e-chāk-e-garebāñ ban gayā

duur ras bhī kis qadar thī jalne vaale kī nazar

baḌhte baḌhte dāġh-e-dil āḳhir charāġhāñ ban gayā

baat un kī rah ga.ī saarā gila bhī dhul gayā

sāmne jab aa ga.e vo maiñ pashemāñ ban gayā

zindagī āsān bhī thī aur thī dushvār bhī

dil ba-qadr-e-zarf 'rāmish' jalva-sāmāñ ban gayā

kya se kya aaKHir junun-e-fitna saman ban gaya

barq-o-tufan ban gaya bagh-o-bahaaran ban gaya

kal talak jis KHwab ki tabir raqs-o-rang thi

ab wo KHwab-e-zindagi KHwab-e-pareshan ban gaya

chal rahi thi sans jab tak raaz andar raaz tha

aur jab tar-e-nafas TuTa to tufan ban gaya

KHun-e-dil ka ek qatra ek harf-e-na-tamam

paDhne walon ke liye tariKH-e-dauran ban gaya

baDh gai jab apni had se jurat-e-awargi

KHud junun minnat-kash-e-chaak-e-gareban ban gaya

dur ras bhi kis qadar thi jalne wale ki nazar

baDhte baDhte dagh-e-dil aaKHir charaghan ban gaya

baat un ki rah gai sara gila bhi dhul gaya

samne jab aa gae wo main pasheman ban gaya

zindagi aasan bhi thi aur thi dushwar bhi

dil ba-qadr-e-zarf 'ramish' jalwa-saman ban gaya