kya shahr-e-nau se mausam-e-saffak kam hue

kyā shahr-e-nau se mausam-e-saffāk kam hue

achchhā huā ki kuchh ḳhas-o-ḳhāshāk kam hue

har lamha siina taane khaḌe rāste meñ haiñ

mere safar ke ḳhaar bhī kyā ḳhaak kam hue

har aadmī to aaj zahīn-o-fatīn hai

daur-e-jadīd meñ kahāñ chālāk kam hue

ye jānñe kī aaj bhī koshish kisī ne kī

kyoñ falsafī ke paas bhī idrāk kam hue

shām-o-sahar to ik hī fazā kartī hai tavāf

āñkhoñ se kab nazāra-e-ġhamnāk kam hue

ab bhī rivāj-o-rasm vahī haiñ magar kahāñ

uryāniyat ke parda-e-poshāk kam hue

'ātish' yahī bahār kī sauġhāt kam nahīñ

is bār-e-gul ke dāman-e-sad-chāk kam hue

kya shahr-e-nau se mausam-e-saffak kam hue

achchha hua ki kuchh KHas-o-KHashak kam hue

har lamha sina tane khaDe raste mein hain

mere safar ke KHar bhi kya KHak kam hue

har aadmi to aaj zahin-o-fatin hai

daur-e-jadid mein kahan chaalak kam hue

ye jaanne ki aaj bhi koshish kisi ne ki

kyon falsafi ke pas bhi idrak kam hue

sham-o-sahar to ek hi faza karti hai tawaf

aankhon se kab nazara-e-ghamnak kam hue

ab bhi riwaj-o-rasm wahi hain magar kahan

uryaniyat ke parda-e-poshak kam hue

'atish' yahi bahaar ki saughat kam nahin

is bar-e-gul ke daman-e-sad-chaak kam hue