کیا شوق ہے آشفتہ سری ڈھونڈ رہے ہو

کیا شوق ہے آشفتہ سری ڈھونڈ رہے ہو

صحرا میں کوئی شاخ ہری ڈھونڈ رہے ہو

منزل سے جو واقف ہیں نہ راہوں سے خبردار

ان لوگوں میں تم راہبری ڈھونڈ رہے ہو

بارش کی تمنا ہے تو بادل کو پکارو

کیوں گرم ہواؤں میں تری ڈھونڈ رہے ہو

جگنو سی چمک پا کے تو اترائے ہوئے تھے

اب تھک کے چراغ سحری ڈھونڈ رہے ہو

جو خود بھی ہے سورج کی ضیاؤں کا طلب گار

اس چاند میں کیا جلوہ گری ڈھونڈ رہے ہو

ہیں بال جو کچھ شیشۂ دل پر انہیں دیکھو

پیالے میں کہاں شیشہ گری ڈھونڈ رہے ہو