kya shikwa karen tohmat-e-be-baal-o-pari ka

kyā shikva kareñ tohmat-e-be-bāl-o-parī kā

har din hai shab-e-zulf kī bedād-garī kā

rahne do abhī baam pe khultī huī āñkheñ

manzar ye mire sāmne hai ḳhush-nazarī kā

ik haath bulāve ke liye rauzan-e-jāñ meñ

ik haath alāmat hai kisī sabz-parī kā

ehsās-e-peshemānī-e-ahbāb na pūchho

har ek ko yaañ ġham hai faqat be-hunarī kā

dīvār-o-dar-o-saqf-o-sutūñ farsh-o-darīcha

rishta kisī ghar se nahīñ hotā safarī kā

bastī mire ahbāb se ḳhālī hai abhī tak

saaya hai mirī jaañ pe faqat bad-nazarī kā

jaadū hai tire jism ke har pech meñ ḳham meñ

nashsha hai rag-o-pai meñ bhī shorīda-sarī kā

chalte rahe tujh tak hī pahuñchne ke liye sab

sab rañg uḌā jaatā hai nādīda-varī kā

in rozoñ hai badlī huī ye tab.a hamārī

ab ḳhushk rahā kartā hai mausam bhī tarī kā

ham kab sar-o-sāmān-e-suḳhan se rahe ḳhālī

ik umr se ye shaġhl rahā dard-sarī kā

kya shikwa karen tohmat-e-be-baal-o-pari ka

har din hai shab-e-zulf ki bedad-gari ka

rahne do abhi baam pe khulti hui aankhen

manzar ye mere samne hai KHush-nazari ka

ek hath bulawe ke liye rauzan-e-jaan mein

ek hath alamat hai kisi sabz-pari ka

ehsas-e-peshemani-e-ahbab na puchho

har ek ko yan gham hai faqat be-hunari ka

diwar-o-dar-o-saqf-o-sutun farsh-o-daricha

rishta kisi ghar se nahin hota safari ka

basti mere ahbab se KHali hai abhi tak

saya hai meri jaan pe faqat bad-nazari ka

jadu hai tere jism ke har pech mein KHam mein

nashsha hai rag-o-pai mein bhi shorida-sari ka

chalte rahe tujh tak hi pahunchne ke liye sab

sab rang uDa jata hai nadida-wari ka

in rozon hai badli hui ye taba hamari

ab KHushk raha karta hai mausam bhi tari ka

hum kab sar-o-saman-e-suKHan se rahe KHali

ek umr se ye shaghl raha dard-sari ka