kya sochte ho ab phulon ki rut bit gai rut bit gai

kyā sochte ho ab phūloñ kī rut biit ga.ī rut biit ga.ī

vo raat ga.ī vo baat ga.ī vo riit ga.ī rut biit ga.ī

ik lahr uThī aur Duub ga.e hoñToñ ke kañval ā.ankhoñ ke diye

ik gūñjtī āñdhī vaqt kī baazī jiit ga.ī rut biit ga.ī

tum aa ga.e merī bāhoñ meñ kaunain kī peñgeñ jhuul ga.iiñ

tum bhuul ga.e, jiine kī jagat se riit ga.ī rut biit ga.ī

phir tair ke mere ashkoñ meñ gul-posh zamāne lauT chale

phir chheḌ ke dil meñ Tīsoñ ke sañgīt ga.ī rut biit ga.ī

ik dhyān ke paañv Dol ga.e ik soch ne baḌh kar thaam liyā

ik aas hañsī ik yaad sunā kar giit ga.ī rut biit ga.ī

ye lāla-o-gul kyā pūchhte ho sab lutf-e-nazar kā qissa hai

rut biit ga.ī jab dil se kisī kī piit ga.ī rut biit ga.ī

kya sochte ho ab phulon ki rut bit gai rut bit gai

wo raat gai wo baat gai wo rit gai rut bit gai

ek lahr uThi aur Dub gae honTon ke kanwal aaankhon ke diye

ek gunjti aandhi waqt ki bazi jit gai rut bit gai

tum aa gae meri bahon mein kaunain ki pengen jhul gain

tum bhul gae, jine ki jagat se rit gai rut bit gai

phir tair ke mere ashkon mein gul-posh zamane lauT chale

phir chheD ke dil mein Tison ke sangit gai rut bit gai

ek dhyan ke panw Dol gae ek soch ne baDh kar tham liya

ek aas hansi ek yaad suna kar git gai rut bit gai

ye lala-o-gul kya puchhte ho sab lutf-e-nazar ka qissa hai

rut bit gai jab dil se kisi ki pit gai rut bit gai