kya tarah hai aashna gahe-gahe na-ashna

kyā tarah hai āshnā gāhe-gahe nā-āshnā

yā to begāne hī rahiye hojiye yā āshnā

pā.emāl-e-sad-jafā nā-haq na ho ai andalīb

sabza-e-begāna bhī thā is chaman kā āshnā

kaun se ye bahr-e-ḳhūbī kī pareshāñ zulf hai

aatī hai āñkhoñ meñ merī mauj dariyā-āshnā

ronā hī aatā hai ham ko dil huā jab se judā

jaa.e rone hī kī hai jaave jab aisā āshnā

nā-samajh hai to jo merī qadr na.iiñ kartā ki shoḳh

kam bahut miltā hai phir dil-ḳhvāh itnā āshnā

bulbuleñ pā.īz meñ kahtī thiiñ hotā kāshke

yak mizha rang farārī is chaman kā āshnā

ko gul-o-lāla kahāñ sumbul saman ham-nastaran

ḳhaak se yaksāñ hue haiñ haa.e kyā kyā āshnā

kyā karūñ kis se kahūñ itnā hī begāna hai yaar

saare 'ālam meñ nahīñ paate kisī kā āshnā

jis se maiñ chāhī visātat un ne ye mujh se kahā

ham to kahte gar miyāñ ham se vo hotā āshnā

yuuñ sunā jā hai ki kartā hai safar kā azm-jazm

saath ab begāna vaz.aoñ ke hamārā āshnā

she'r 'sā.ib' kā munāsib hai hamārī or se

sāmne us ke paḌhe gar ye koī jā āshnā

tā-ba-jāñ mā ham-rahīm va tā-ba-manzil dīgarāñ

farq bāshad jān-e-mā az-āshnā tā-āshnā

daaġh hai tābāñ alaihir-rahma kā chhātī pe 'mīr'

ho najāt us ko bechāra ham se bhī thā āshnā

kya tarah hai aashna gahe-gahe na-ashna

ya to begane hi rahiye hojiye ya aashna

paemal-e-sad-jafa na-haq na ho ai andalib

sabza-e-begana bhi tha is chaman ka aashna

kaun se ye bahr-e-KHubi ki pareshan zulf hai

aati hai aankhon mein meri mauj dariya-ashna

rona hi aata hai hum ko dil hua jab se juda

jae rone hi ki hai jawe jab aisa aashna

na-samajh hai to jo meri qadr nain karta ki shoKH

kam bahut milta hai phir dil-KHwah itna aashna

bulbulen paiz mein kahti thin hota kashke

yak mizha rang farari is chaman ka aashna

ko gul-o-lala kahan sumbul saman ham-nastaran

KHak se yaksan hue hain hae kya kya aashna

kya karun kis se kahun itna hi begana hai yar

sare 'alam mein nahin pate kisi ka aashna

jis se main chahi wisatat un ne ye mujh se kaha

hum to kahte gar miyan hum se wo hota aashna

yun suna ja hai ki karta hai safar ka azm-jazm

sath ab begana wazaon ke hamara aashna

she'r 'saib' ka munasib hai hamari or se

samne us ke paDhe gar ye koi ja aashna

ta-ba-jaan ma ham-rahim wa ta-ba-manzil digaran

farq bashad jaan-e-ma az-ashna ta-ashna

dagh hai taban alaihir-rahma ka chhati pe 'mir'

ho najat us ko bechaara hum se bhi tha aashna