kya taraqqi ke alam-bardar andhe ho gae

kyā taraqqī ke alam-bardār andhe ho ga.e

do ko bīnā.ī milī to chaar andhe ho ga.e

jin kā na.ara thā naqāb-e-ruḳh uThā jalva dikhā

jab nazar aaya jamāl-e-yār andhe ho ga.e

har sitam ke baad us ne muskurā kar baat kī

ye vufūr-e-shauq meñ har baar andhe ho ga.e

ḳhud-ġharaz haiñ ālim-o-vā.iz shikam-parvar haiñ piir

fauj kyā kartī sipah-sālār andhe ho ga.e

ġhair kī gardan meñ bāñheñ merī gardan par chhurī

aap ko kyā ho gayā sarkār andhe ho ga.e

kārvān-e-ilm-o-fan jaa.e na jaane kis taraf

aur mujh jaise agar do-chār andhe ho ga.e

kor-chashmī par hañsā koī to andāza huā

ham kisī ke ishq meñ be-kār andhe ho ga.e

ahl-e-kashtī kyā kareñ hai nā-ḳhudāoñ kā ye haal

aa ga.ī jab haath meñ patvār andhe ho ga.e

aap ko ash.ār meñ ḳhūbī nazar aatī nahīñ

merī ustādī se hai inkār andhe ho ga.e

kya taraqqi ke alam-bardar andhe ho gae

do ko binai mili to chaar andhe ho gae

jin ka nara tha naqab-e-ruKH uTha jalwa dikha

jab nazar aaya jamal-e-yar andhe ho gae

har sitam ke baad us ne muskura kar baat ki

ye wufur-e-shauq mein har bar andhe ho gae

KHud-gharaz hain aalim-o-waiz shikam-parwar hain pir

fauj kya karti sipah-salar andhe ho gae

ghair ki gardan mein banhen meri gardan par chhuri

aap ko kya ho gaya sarkar andhe ho gae

karwan-e-ilm-o-fan jae na jaane kis taraf

aur mujh jaise agar do-chaar andhe ho gae

kor-chashmi par hansa koi to andaza hua

hum kisi ke ishq mein be-kar andhe ho gae

ahl-e-kashti kya karen hai na-KHudaon ka ye haal

aa gai jab hath mein patwar andhe ho gae

aap ko ashaar mein KHubi nazar aati nahin

meri ustadi se hai inkar andhe ho gae