kya tere dil mein ai but hon dil-o-jaan mahfuz

kyā tire dil meñ ai but hoñ dil-o-jāñ mahfūz

na koī diin hai mahfūz na īmāñ mahfūz

band darvāze bhī us ke liye khul jaate haiñ

maut ke vāste hai kaaḳh na aivāñ mahfūz

chashm-e-kāfir ne tirī kho diye sab ke īmān

kyā zamāne meñ rahe koī musalmāñ mahfūz

mausam-e-gul meñ qasam hai tujhe ai dast-e-junūñ

rahne paa.e na koī jaib-o-garebāñ mahfūz

ashk kyoñ mahfil-e-aġhyār meñ barbād kiye

tere motī na rahe dīda-e-giryāñ mahfūz

mausam-e-gul meñ ham ai bād-e-ḳhizāñ samjhe the

tere jhoñkoñ se rahegā na gulistāñ mahfūz

un ke dīvānoñ kī vahshat kā jo aalam hai yahī

rahne pā.egā na dāmān-e-bayābāñ mahfūz

de ga.ī bād-e-sabā ham se pareshānoñ ko

terī nig.hat na rahī gesū-e-jānāñ mahfūz

ham se dīvāne bhī aa.e haiñ ḳhudā ḳhair kare

ai qayāmat na rahegā tirā dāmāñ mahfūz

ai ḳhudā terī ḳhudā.ī meñ ye kyā kyā kartā

maut ke ḳhauf se hotā agar insāñ mahfūz

naam rah jā.egā 'naushād' jahāñ meñ kuchh din

baad mere jo rahegā mirā dīvāñ mahfūz

kya tere dil mein ai but hon dil-o-jaan mahfuz

na koi din hai mahfuz na iman mahfuz

band darwaze bhi us ke liye khul jate hain

maut ke waste hai kaKH na aiwan mahfuz

chashm-e-kafir ne teri kho diye sab ke iman

kya zamane mein rahe koi musalman mahfuz

mausam-e-gul mein qasam hai tujhe ai dast-e-junun

rahne pae na koi jaib-o-gareban mahfuz

ashk kyon mahfil-e-aghyar mein barbaad kiye

tere moti na rahe dida-e-giryan mahfuz

mausam-e-gul mein hum ai baad-e-KHizan samjhe the

tere jhonkon se rahega na gulistan mahfuz

un ke diwanon ki wahshat ka jo aalam hai yahi

rahne paega na daman-e-bayaban mahfuz

de gai baad-e-saba hum se pareshanon ko

teri nighat na rahi gesu-e-jaanan mahfuz

hum se diwane bhi aae hain KHuda KHair kare

ai qayamat na rahega tera daman mahfuz

ai KHuda teri KHudai mein ye kya kya karta

maut ke KHauf se hota agar insan mahfuz

nam rah jaega 'naushad' jahan mein kuchh din

baad mere jo rahega mera diwan mahfuz