kya tere husn mein kami hui hai

kyā tire husn meñ kamī huī hai

yā hamārī nazar bharī huī hai

ḳhuun īñdhan banā hai āñkhoñ meñ

tab kahīñ jā ke raushnī huī hai

dost kar ġhaur us pe tafsīlan

tujh se jo baat sarsarī huī hai

sun ke mausam kā haal sochtā huuñ

ḳhilqat-e-shahr kyoñ Darī huī hai

uTh rahā hai dhuāñ zamīnoñ se

aag aflāk meñ lagī huī hai

dost kyā aaj tū hai afsurda

yā tabī'at mirī bujhī huī hai

iḳhtilāfāt haiñ magar phir bhī

guftugū ham meñ bāhamī huī hai

hijr kaisā ki yaar kī ḳhushbū

mere andar rachī-basī huī hai

aaj kā din bahut mubārak hai

aaj dushman se dostī huī hai

kyoñ havelī ko maiñ kahūñ zindāñ

ek khiḌkī agar khulī huī hai

tere aane kī thī nahīñ ummīd

aa gayā to dilī ḳhushī huī hai

ham se pūchho ki hai mohabbat kyā

ham ne do chaar baar kī huī hai

aaj terā ḳhayāl saath rahā

aaj bharpūr shā'irī huī hai

paañv 'āsim' sañbhāl kar rakhnā

barf fōtpath par jamī huī hai

kya tere husn mein kami hui hai

ya hamari nazar bhari hui hai

KHun indhan bana hai aankhon mein

tab kahin ja ke raushni hui hai

dost kar ghaur us pe tafsilan

tujh se jo baat sarsari hui hai

sun ke mausam ka haal sochta hun

KHilqat-e-shahr kyon Dari hui hai

uTh raha hai dhuan zaminon se

aag aflak mein lagi hui hai

dost kya aaj tu hai afsurda

ya tabi'at meri bujhi hui hai

iKHtilafat hain magar phir bhi

guftugu hum mein bahami hui hai

hijr kaisa ki yar ki KHushbu

mere andar rachi-basi hui hai

aaj ka din bahut mubarak hai

aaj dushman se dosti hui hai

kyon haweli ko main kahun zindan

ek khiDki agar khuli hui hai

tere aane ki thi nahin ummid

aa gaya to dili KHushi hui hai

hum se puchho ki hai mohabbat kya

hum ne do chaar bar ki hui hai

aaj tera KHayal sath raha

aaj bharpur sha'iri hui hai

panw 'asim' sanbhaal kar rakhna

barf footpath par jami hui hai