کیا ترے حسن میں کمی ہوئی ہے

کیا ترے حسن میں کمی ہوئی ہے

یا ہماری نظر بھری ہوئی ہے

خون ایندھن بنا ہے آنکھوں میں

تب کہیں جا کے روشنی ہوئی ہے

دوست کر غور اس پہ تفصیلاً

تجھ سے جو بات سرسری ہوئی ہے

سن کے موسم کا حال سوچتا ہوں

خلقت شہر کیوں ڈری ہوئی ہے

اٹھ رہا ہے دھواں زمینوں سے

آگ افلاک میں لگی ہوئی ہے

دوست کیا آج تو ہے افسردہ

یا طبیعت مری بجھی ہوئی ہے

اختلافات ہیں مگر پھر بھی

گفتگو ہم میں باہمی ہوئی ہے

ہجر کیسا کہ یار کی خوشبو

میرے اندر رچی بسی ہوئی ہے

آج کا دن بہت مبارک ہے

آج دشمن سے دوستی ہوئی ہے

کیوں حویلی کو میں کہوں زنداں

ایک کھڑکی اگر کھلی ہوئی ہے

تیرے آنے کی تھی نہیں امیدؔ

آ گیا تو دلی خوشی ہوئی ہے

ہم سے پوچھو کہ ہے محبت کیا

ہم نے دو چار بار کی ہوئی ہے

آج تیرا خیال ساتھ رہا

آج بھرپور شاعری ہوئی ہے

پاؤں عاصمؔ سنبھال کر رکھنا

برف فٹ پاتھ پر جمی ہوئی ہے