کیا تم کو بتاؤں ہم نفسو کیوں ضبط کا دامن چھوڑ دیا

کیا تم کو بتاؤں ہم نفسو کیوں ضبط کا دامن چھوڑ دیا

سینے میں تپش کچھ ایسی تھی اک داغ کو روشن چھوڑ دیا

آداب جنوں تھے پیش نظر اور ہوش تھا اتنا وحشت میں

اپنا جو گریباں یاد آیا اس شوخ کا دامن چھوڑ دیا

طوفاں کا گزر صیاد کا ڈر کچھ بھی تو نہ تھا اس مامن میں

کانٹوں کی طلب ہی تھی شاید خود اپنا نشیمن چھوڑ دیا

کب تک میں رہین درد رہوں کب تک مرا دامن چاک رہے

جب یاد بڑھی کچھ حد سے سوا تو نالہ و شیون چھوڑ دیا

اب ذوق اسیری اس کو کہیں یا کم نگہی اپنی منظرؔ

زنجیر نہیں جب پاؤں میں کیوں کوچہ و برزن چھوڑ دیا

ہنگام بہاراں ہے شاید پوچھو تو ذرا کیوں منظرؔ نے

یوں آبلہ پا ہونے کے لئے پھر گوشۂ گلشن چھوڑ دیا