kya tumko ilaj-e-dil-e-shaida nahin aata

kyā tum ko ilāj-e-dil-e-shaidā nahīñ aatā

aatā hai par is tarah ki goyā nahīñ aatā

ho jaatī thī taskīn so ab fart-e-alam se

is baat ko rote haiñ ki ronā nahīñ aatā

tum ho ki tumheñ vāda-vafā.ī kī nahīñ ḳhū

maiñ huuñ ki mujhe tum se taqāzā nahīñ aatā

hai paas ye kis kī nigah-e-mahv-e-hayā kā

lab tak jo mire harf-e-tamannā nahīñ aatā

un kī nigah-e-mast ke jalve haiñ nazar meñ

bhūle se bhī zikr-e-mai-o-mīnā nahīñ aatā

shoḳhī se vo mānā-e-sitam pūchh rahe haiñ

ab lafz-e-jafā bhī unheñ goyā nahīñ aatā

maiñ dard kī lazzat se razā-mand huuñ 'hasrat'

mujh ko sitam-e-yār kā shikvā nahīñ aatā

kya tum ko ilaj-e-dil-e-shaida nahin aata

aata hai par is tarah ki goya nahin aata

ho jati thi taskin so ab fart-e-alam se

is baat ko rote hain ki rona nahin aata

tum ho ki tumhein wada-wafai ki nahin KHu

main hun ki mujhe tum se taqaza nahin aata

hai pas ye kis ki nigah-e-mahw-e-haya ka

lab tak jo mere harf-e-tamanna nahin aata

un ki nigah-e-mast ke jalwe hain nazar mein

bhule se bhi zikr-e-mai-o-mina nahin aata

shoKHi se wo mana-e-sitam puchh rahe hain

ab lafz-e-jafa bhi unhen goya nahin aata

main dard ki lazzat se raza-mand hun 'hasrat'

mujh ko sitam-e-yar ka shikwa nahin aata