kya tumne bhi hai kal ratjaga kiya

kyā tum ne bhī hai kal ratjagā kiyā

tumheñ bhī ishq ham se ho gayā kyā

mirā tū mudda.ā tū mas.ala thī

bichhātā gar tujhe to oḌhtā kyā

yahāñ jis ko bhī dekho zo.am meñ hai

hamāre shahr ko āḳhir huā kyā

mire atrāf meñ terī sadā thī

tujhe dair-o-haram meñ DhūñDhtā kyā

hai tere zehn meñ tark-e-ta.alluq

tujhe phir ham sā koī mil gayā kyā

bhaTaknā jab merī qismat meñ shāmil

pata sahrāoñ kā phir pūchhnā kyā

maiñ us ke saath uḌtā jā rahā thā

mire pīchhe thī vo bahkī havā kyā

zamāne par bharosa kar liyā hai

'nazar' tū ho gayā hai bāvlā kyā

kya tum ne bhi hai kal ratjaga kiya

tumhein bhi ishq hum se ho gaya kya

mera tu muddaa tu masala thi

bichhata gar tujhe to oDhta kya

yahan jis ko bhi dekho zoam mein hai

hamare shahr ko aaKHir hua kya

mere atraf mein teri sada thi

tujhe dair-o-haram mein DhunDhta kya

hai tere zehn mein tark-e-talluq

tujhe phir hum sa koi mil gaya kya

bhaTakna jab meri qismat mein shamil

pata sahraon ka phir puchhna kya

main us ke sath uDta ja raha tha

mere pichhe thi wo bahki hawa kya

zamane par bharosa kar liya hai

'nazar' tu ho gaya hai bawla kya