kya tumhein yaad hai insan hua karte the

kyā tumheñ yaad hai insān huā karte the

ye bayābāñ kabhī gunjān huā karte the

vaqt tham jaatā thā dhaḌkan kī sadā sunte hue

jab tire aane ke imkān huā karte the

saañs ruk jaatī thī lahje meñ kasak hotī thī

jis samay kuuch ke elaan huā karte the

nāma-bar aatā thā raste bhī take jaate the

kyā javāñ vaqt thā rūmān huā karte the

jaane vāloñ ko kabhī lauTnā hotā hī na thā

multavī tab bhī yuuñ paimān huā karte the

chashm-o-abrū shab-e-mahtāb jamāl-e-sāqī

kyā tamannā bhare unvān huā karte the

bahr-e-ātish meñ ravāñ shauq kī naav rahtī

ishq dushvār thā bohrān huā karte the

dil jale kūcha-e-jānāñ ke fusūñ-zīnoñ par

abr aatā thā to mehmān huā karte the

sañg sah lete the sahrā meñ nikal jaate the

qais us vaqt ke nādān huā karte the

ye gumāñ thā ki savāloñ ke javāb ā.eñge

ham the fahhām so armān huā karte the

vaqt guzregā to hālāt sudhar jā.eñge

vaqt ke qahr se anjān huā karte the

un dinoñ chāñd pe ik buḌhiyā rahā kartī thī

tifl kyā saada the hairān huā karte the

log jab taish meñ aate the to chhup jaate the

kyā ajab tund vo haijān huā karte the

kaan sun lete the jazboñ kī zabāñ ko aksar

fāsle the magar āsān huā karte the

yād-e-ayyām baḌī talḳh zamīñ hai 'āsim'

is zamīñ meñ kabhī dīvān huā karte the

kya tumhein yaad hai insan hua karte the

ye bayaban kabhi gunjaan hua karte the

waqt tham jata tha dhaDkan ki sada sunte hue

jab tere aane ke imkan hua karte the

sans ruk jati thi lahje mein kasak hoti thi

jis samay kuch ke elan hua karte the

nama-bar aata tha raste bhi take jate the

kya jawan waqt tha ruman hua karte the

jaane walon ko kabhi lauTna hota hi na tha

multawi tab bhi yun paiman hua karte the

chashm-o-abru shab-e-mahtab jamal-e-saqi

kya tamanna bhare unwan hua karte the

bahr-e-atish mein rawan shauq ki naw rahti

ishq dushwar tha bohran hua karte the

dil jale kucha-e-jaanan ke fusun-zinon par

abr aata tha to mehman hua karte the

sang sah lete the sahra mein nikal jate the

qais us waqt ke nadan hua karte the

ye guman tha ki sawalon ke jawab aaenge

hum the fahham so arman hua karte the

waqt guzrega to haalat sudhar jaenge

waqt ke qahr se anjaan hua karte the

un dinon chand pe ek buDhiya raha karti thi

tifl kya sada the hairan hua karte the

log jab taish mein aate the to chhup jate the

kya ajab tund wo haijaan hua karte the

kan sun lete the jazbon ki zaban ko aksar

fasle the magar aasan hua karte the

yaad-e-ayyam baDi talKH zamin hai 'asim'

is zamin mein kabhi diwan hua karte the