kya us ka gila yurish-e-tohmat bahut hai

kyā us kā gila yūrish-e-tohmāt bahut hai

zinda haiñ jo ham log yahī baat bahut hai

jo tum ne bujhā Daale diye un ko jalā do

ai sub.h ke matavālo abhī raat bahut hai

is vāste gul-chīñ ko huī mujh se adāvat

taz.īn-e-gulistāñ meñ mirā haath bahut hai

in firqa-parastoñ ke diloñ meñ hai kudūrat

aur vird-e-zabāñ lafz-e-musāvāt bahut hai

in amn-pasandoñ ke parakhne ko kasauTī

is daur kī tafsīl-e-fasādāt bahut hai

ye beToñ ke sar bhaa.ī kā ḳhuuñ bahnoñ kī chīḳheñ

ibrat ho agar ham ko ye sauġhāt bahut hai

behis ho jo insāñ to kahe jā.iye kuchh bhī

ġhairat ho agar dil meñ to ik baat bahut hai

siine se tarī ġham ko lagā.e to rakheñge

nā-sāz magar gardish-e-hālāt bahut hai

haañ baiTho gadā ban ke baras jā.egī daulat

in puḳhta mazāroñ meñ karāmāt bahut hai

kya us ka gila yurish-e-tohmat bahut hai

zinda hain jo hum log yahi baat bahut hai

jo tum ne bujha Dale diye un ko jala do

ai subh ke matawalo abhi raat bahut hai

is waste gul-chin ko hui mujh se adawat

tazin-e-gulistan mein mera hath bahut hai

in firqa-paraston ke dilon mein hai kudurat

aur wird-e-zaban lafz-e-musawat bahut hai

in amn-pasandon ke parakhne ko kasauTi

is daur ki tafsil-e-fasadat bahut hai

ye beTon ke sar bhai ka KHun bahnon ki chiKHen

ibrat ho agar hum ko ye saughat bahut hai

behis ho jo insan to kahe jaiye kuchh bhi

ghairat ho agar dil mein to ek baat bahut hai

sine se tari gham ko lagae to rakhenge

na-saz magar gardish-e-haalat bahut hai

han baiTho gada ban ke baras jaegi daulat

in puKHta mazaron mein karamat bahut hai