کیا یادگار دل پہ لگائی خراش ہے

کیا یادگار دل پہ لگائی خراش ہے

جراح کم ہنر مجھے تیری تلاش ہے

صیقل گر زماں تو ذرا معجزہ دکھا

یادوں کے آئنے میں کوئی پاش پاش ہے

ماضی کی سرحدوں سے پرے جا کے ایک دن

پوچھوں گا اپنے آپ سے کیا بود و باش ہے

کیا کیجئے گا پڑھ کے مری خود نوشت کو

لکھا ورق ورق پہ اگر اور کاش ہے

اس کشمکش میں رہتے ہیں فکر و قلم صدا

رکھنا بھی راز ہے اسے کرنا بھی فاش ہے

بے روزگار ہجر کے تاجر نے کر دیا

مزدور وصل ہوں سو تلاش معاش ہے

قاب جہاں پہ رکھے پھلوں نے مجھے کہا

مہمان تیرے حصے میں اک آدھ قاش ہے