kya yaadgar dil pe lagai KHarash hai

kyā yādgār dil pe lagā.ī ḳharāsh hai

jarrāh-e-kam-hunar mujhe terī talāsh hai

saiqal-gar-e-zamāñ tū zarā mo'jiza dikhā

yādoñ ke aa.ine meñ koī paash paash hai

maazī kī sarhadoñ se pare jā ke ek din

pūchhūñgā apne aap se kyā būd-o-bāsh hai

kyā kījiyegā paḌh ke mirī ḳhud-navisht ko

likkhā varaq varaq pe agar aur kaash hai

is kashmakash meñ rahte haiñ fikr-o-qalam sadā

rakhnā bhī raaz hai use karnā bhī faash hai

be-rozgār hijr ke tājir ne kar diyā

mazdūr-e-vasl huuñ so talāsh-e-ma.āsh hai

qāb-e-jahāñ pe rakkhe phaloñ ne mujhe kahā

mehmān tere hisse meñ ik-ādh qaash hai

kya yaadgar dil pe lagai KHarash hai

jarrah-e-kam-hunar mujhe teri talash hai

saiqal-gar-e-zaman tu zara mo'jiza dikha

yaadon ke aaine mein koi pash pash hai

mazi ki sarhadon se pare ja ke ek din

puchhunga apne aap se kya bud-o-bash hai

kya kijiyega paDh ke meri KHud-nawisht ko

likkha waraq waraq pe agar aur kash hai

is kashmakash mein rahte hain fikr-o-qalam sada

rakhna bhi raaz hai use karna bhi fash hai

be-rozgar hijr ke tajir ne kar diya

mazdur-e-wasl hun so talash-e-maash hai

qab-e-jahan pe rakkhe phalon ne mujhe kaha

mehman tere hisse mein ik-adh qash hai