kya ye mumkin hai ki ek KHwab musalsal dekhun

kyā ye mumkin hai ki ik ḳhvāb musalsal dekhūñ

niiñd khul jaa.e to manzar yahī phir kal dekhūñ

nīm-vā parda-e-dil kaash girā de koī

dekh pā.ūñ tirā chehra to mukammal dekhūñ

qaaf ke paar kisī des meñ jā kar utrūñ

āsmāñ par tujhe namnāk sā bādal dekhūñ

dasht-e-imkāñ se pare vaqt ke dar par pahuñchūñ

ek lamhe ko jakaḌ luuñ use pal pal dekhūñ

jaane kyā ālam-e-vahshat-asarī ho andar

kaun sā dasht vahāñ kaun sā jañgal dekhūñ

nabz ruk jaa.e nahīñ ye nahīñ lekin ai kaash

hazrat-e-dil maiñ kabhī 'mīr' sā dañggal dekhūñ

kya ye mumkin hai ki ek KHwab musalsal dekhun

nind khul jae to manzar yahi phir kal dekhun

nim-wa parda-e-dil kash gira de koi

dekh paun tera chehra to mukammal dekhun

qaf ke par kisi des mein ja kar utrun

aasman par tujhe namnak sa baadal dekhun

dasht-e-imkan se pare waqt ke dar par pahunchun

ek lamhe ko jakaD lun use pal pal dekhun

jaane kya aalam-e-wahshat-asari ho andar

kaun sa dasht wahan kaun sa jangal dekhun

nabz ruk jae nahin ye nahin lekin ai kash

hazrat-e-dil main kabhi 'mir' sa danggal dekhun