کیا زمانہ آ گیا ہے عیب بھی فن ہو گئے

کیا زمانہ آ گیا ہے عیب بھی فن ہو گئے

ہم جنہیں پتھر سمجھتے تھے وہ درپن ہو گئے

گھر کے کونے میں پڑے رہتے ہیں خاموشی کے ساتھ

آج کل ماں باپ بھی مٹی کے برتن ہو گئے

یوں ترقی کی طرف ہم نے بڑھائے ہیں قدم

تنگ دامن تھے ہی اب تو چاک دامن ہو گئے

اے حکومت اس طرف کیا تو نے سوچا ہے کبھی

جو ترے مداح تھے کیوں تیرے دشمن ہو گئے

رات دن تیرے لیے جلنا ہمارا کام ہے

اے سیاست ہم ترے چولھے کا ایندھن ہو گئے

آدمی ان کو پہنتا ہے لباسوں کی طرح

جھوٹ عیاری فریب و مکر فیشن ہو گئے

میڈیا والوں نے ایسا کھیل کھیلا دھرم کا

جن میں کل تک دوستی تھی آج دشمن ہو گئے