kya zaruri hai ab ye batana mera

kyā zarūrī hai ab ye batānā mirā

TūTtī shāḳh par thā Thikānā mirā

ġham nahīñ ab milī haiñ jo tanhā.iyāñ

anjuman anjuman thā fasāna mirā

jo bhī aayā hadaf par vo kab bach sakā

cūktā hī nahīñ thā nishāna mirā

ik zamāna kabhī thā mirā ham-navā

tum ne dekhā kahāñ vo zamāna mirā

arz-e-bhopal se thā ta.alluq kabhī

ab to sab kuchh hai ye lāḌkāna mirā

nā-tavānī pe merī jo haiñ ḳhanda-zan

in ko album purānā dikhānā mirā

mere jaane se behtar hai 'mohsin' kabhī

bazm-e-sher-o-suḳhan meñ na jaanā mirā

kya zaruri hai ab ye batana mera

TuTti shaKH par tha Thikana mera

gham nahin ab mili hain jo tanhaiyan

anjuman anjuman tha fasana mera

jo bhi aaya hadaf par wo kab bach saka

cukta hi nahin tha nishana mera

ek zamana kabhi tha mera ham-nawa

tum ne dekha kahan wo zamana mera

arz-e-bhopal se tha talluq kabhi

ab to sab kuchh hai ye laDkana mera

na-tawani pe meri jo hain KHanda-zan

in ko album purana dikhana mera

mere jaane se behtar hai 'mohsin' kabhi

bazm-e-sher-o-suKHan mein na jaana mera