kya zaruri hai ki phande pe hi laTka jae

kyā zarūrī hai kī phande pe hī laTkā jaa.e

ban ke faulād chalo hijr ko kaaTā jaa.e

kaun hai kis ko bayābāñ meñ pukārā jaa.e

ḳhud hī ab paañv ke kāñToñ ko nikālā jaa.e

itnī jaldī na use dil meñ basāyā jaa.e

aur kuchh roz na.e shaḳhs ko parkhā jaa.e

'ain mumkin hai palaT kar tumheñ de deñ na javāb

ab na.ī nasl ke bachchoñ ko na Tokā jaa.e

ik daf'a Duub ke niklā huuñ yahī kaafī hai

kaun ab 'ishq ke dariyā meñ dubāra jaa.e

maiñ 'asar' 'ishq meñ tanhā to ḳhatāvār nahīñ

us ke sar bhī koī ilzām lagāyā jaa.e

kya zaruri hai ki phande pe hi laTka jae

ban ke faulad chalo hijr ko kaTa jae

kaun hai kis ko bayaban mein pukara jae

KHud hi ab panw ke kanTon ko nikala jae

itni jaldi na use dil mein basaya jae

aur kuchh roz nae shaKHs ko parkha jae

'ain mumkin hai palaT kar tumhein de den na jawab

ab nai nasl ke bachchon ko na Toka jae

ek daf'a Dub ke nikla hun yahi kafi hai

kaun ab 'ishq ke dariya mein dubara jae

main 'asar' 'ishq mein tanha to KHatawar nahin

us ke sar bhi koi ilzam lagaya jae