kyon aankh muztarib hai jo dil pak-baz hai

kyoñ aañkh muztarib hai jo dil pāk-bāz hai

shāyad mizāj-e-ishq meñ ḳhū-e-majāz hai

kyā ab bhī husn-o-ishq meñ kuchh imtiyāz hai

merī jo ruuh meñ hai vo terā hī raaz hai

barq-e-nigāh-e-nāz harīf-e-niyāz hai

in kā lagāo laag ke parde meñ raaz hai

dil meñ kahāñ samā.e kisī kā jamāl-o-husn

ā.īne kī nigāh meñ ā.īna-sāz hai

mujh ko bhī ab yaqīñ hai ki hastī hai be-sabāt

barham nigāh aap kī tafsīl-e-rāz hai

ghar se talāsh-e-dost meñ ye kah ke chal diyā

vo mil hī jā.eñge ki ḳhudā kārsāz hai

aisī barat rahā huuñ maiñ bātoñ meñ ehtiyāt

jaise ki merā rāz-e-mohabbat bhī raaz hai

'naḳhshab' maiñ bach ke chaltā huuñ farsūda raah se

merā mazāq-e-shā.irī jiddat-tarāz hai

kyon aankh muztarib hai jo dil pak-baz hai

shayad mizaj-e-ishq mein KHu-e-majaz hai

kya ab bhi husn-o-ishq mein kuchh imtiyaz hai

meri jo ruh mein hai wo tera hi raaz hai

barq-e-nigah-e-naz harif-e-niyaz hai

in ka lagao lag ke parde mein raaz hai

dil mein kahan samae kisi ka jamal-o-husn

aaine ki nigah mein aaina-saz hai

mujh ko bhi ab yaqin hai ki hasti hai be-sabaat

barham nigah aap ki tafsil-e-raaz hai

ghar se talash-e-dost mein ye kah ke chal diya

wo mil hi jaenge ki KHuda karsaz hai

aisi barat raha hun main baaton mein ehtiyat

jaise ki mera raaz-e-mohabbat bhi raaz hai

'naKHshab' main bach ke chalta hun farsuda rah se

mera mazaq-e-shairi jiddat-taraaz hai