کیوں آنکھ مضطرب ہے جو دل پاکباز ہے

کیوں آنکھ مضطرب ہے جو دل پاکباز ہے

شاید مزاج عشق میں خوئے مجاز ہے

کیا اب بھی حسن و عشق میں کچھ امتیاز ہے

میری جو روح میں ہے وہ تیرا ہی راز ہے

برق نگاہ ناز حریف نیاز ہے

ان کا لگاؤ لاگ کے پردے میں راز ہے

دل میں کہاں سمائے کسی کا جمال و حسن

آئینہ کی نگاہ میں آئینہ ساز ہے

مجھ کو بھی اب یقیں ہے کہ ہستی ہے بے ثبات

برہم نگاہ آپ کی تفصیل راز ہے

گھر سے تلاش دوست میں یہ کہہ کے چل دیا

وہ مل ہی جائیں گے کہ خدا کارساز ہے

ایسی برت رہا ہوں میں باتوں میں احتیاط

جیسے کہ میرا راز محبت بھی راز ہے

نخشبؔ میں بچ کے چلتا ہوں فرسودہ راہ سے

میرا مذاق شاعری جدت طراز ہے