kyon ai KHayal-e-yar tujhe kya KHabar nahin

kyoñ ai ḳhayāl-e-yār tujhe kyā ḳhabar nahīñ

maiñ kyoñ batā.ūñ dard kidhar hai kidhar nahīñ

nashtar kā kaam kyā hai ab achchhā hai dard-e-dil

sadqe tire nahīñ nahīñ ai chāra-gar nahīñ

kahtī hai ahl-e-zauq se betābi-e-ḳhayāl

jis meñ ye iztirāb kī ḳhū ho bashar nahīñ

hastī kā qāfila sar-e-manzil pahuñch gayā

aur ham kahā kiye abhī vaqt-e-safar nahīñ

dīvān-gān-e-ishq pe kyā jaane kyā banī

vāraftagī-e-husn ko apnī ḳhabar nahīñ

duniyā-e-dard-e-dil hai to duniyā-e-shauq-e-rūh

hoñ aur bhī jahāñ mujhe kuchh bhī ḳhabar nahīñ

sahrā-e-ishq-o-hastī-e-mauhūm-o-rāz-e-husn

in manziloñ meñ dil sā koī rāhbar nahīñ

har zarra jis se ik dil-e-muztar na ban sake

vo koī aur chiiz hai terī nazar nahīñ

is be-dilī se kahne kā 'beḳhud' ma.aal kyā

alfāz kuchh haiñ jam.a ma.ānī magar nahīñ

kyon ai KHayal-e-yar tujhe kya KHabar nahin

main kyon bataun dard kidhar hai kidhar nahin

nashtar ka kaam kya hai ab achchha hai dard-e-dil

sadqe tere nahin nahin ai chaara-gar nahin

kahti hai ahl-e-zauq se betabi-e-KHayal

jis mein ye iztirab ki KHu ho bashar nahin

hasti ka qafila sar-e-manzil pahunch gaya

aur hum kaha kiye abhi waqt-e-safar nahin

diwan-gan-e-ishq pe kya jaane kya bani

waraftagi-e-husn ko apni KHabar nahin

duniya-e-dard-e-dil hai to duniya-e-shauq-e-ruh

hon aur bhi jahan mujhe kuchh bhi KHabar nahin

sahra-e-ishq-o-hasti-e-mauhum-o-raaz-e-husn

in manzilon mein dil sa koi rahbar nahin

har zarra jis se ek dil-e-muztar na ban sake

wo koi aur chiz hai teri nazar nahin

is be-dili se kahne ka 'beKHud' maal kya

alfaz kuchh hain jama maani magar nahin